Bi mau i d'Stadt amne Namittag
Bi umegloffe chli hie u da
Ha nüt Konkrets i Planig gha
U plötzlech gsehni die Lüt dört stah

E Mönscheschlange steit da a
Vormne Hus das het zwöi Türe gha
U ne grosse, starche, bärtige Ma
Het ab u zue öpper ichegla

U bir zwöite Türe näbedra
Isch mängisch öpper usecho
Die hei es Strahle i de Ouge gha
Hei glachet u si schnäll dervo

U so stani also i dere Schlange a
Vor mir zwöi Ching u ne dicke Ma
U die alti Dame hingerdra
Het es Hündli a dr Leine gha

S'geit langsam vorwärts, nadisna
Hinger mir meh Lüt als vornedra
Dr dick Ma hei si icheglah
U als nächschte bi de i scho dra

itz geit d'Türe uf u i cha ga
E grosse läre Rum isch da
Es het ke Möbel u ke Bilder gha
U d'Türe geit zue hingerdra

Quer düre Rum si d'Lüt am schtah
Imne Halbkreis schteit die Schlange da
Vor dr zwöite Tür e bärtige Ma
Het ab u zue .öpper usegla